Postimi i plotë i këshilltarit të PVD-së në Bujanoc z.Rahim Salihi:

Dëshmorët janë të shenjtë! Fëmijët e tyre janë të njejtë!

APN po vazhdon me standardet e dyfishta!

Ka kohë që në Preshevë po bëhet politikë me “largimin e njerzve nga puna”! Kryesisht po flitet për ata të cilëve iu ka skaduar kontrata e punës. 

Bujës së madhe iu kanë bashkangjitur edhe akterë nga Bujanoci. Me një kampanjë të ashpër e me strategji të mirëmenduar nuk po zgjedhin mjete për të sulmuar qeverisjen atje.

Në qendër të kësaj kampanje, në fillim, kishin vendosur Leutrim Shahinin, djalin e dëshmorit Shaban Shahini. 

Postimet rreth skadimit të kontratës së Leutrimit, si rrufe, u shpërndanë gjithëandej. Me Leutrimin u solidarizuan të gjithë, përfshi edhe vet komunën e Preshevës dhe udhëheqësit e sajë. Leutrimi u kthy në punë, në administratën komunale të Preshevës!

Dhe përderisa për skadimin e kontratave dhe largimin nga puna të të angazhuarve në Preshevë pati dhe po vazhdohet të ketë postime të përditshme, në Bujanoc, në heshtje, pushteti i udhëhequr nga APN, ka larguar mbi 20  të rinjë që ishin të angazhuar me kontrata.

Disa prej tyre edhe me më shumë se 6 vite angazhim.  E disa edhe me më shumë se 10 vite në punë!

Shumica gra e vajza që kanë vendosur që jetën e tyre dhe krijimin e familjeve ta zhvillojnë këtu në vendlindje.

Në mesin e të larguarave nga puna është edhe Kimete Salihu, nga Bilaçi, vajza e dëshmorit Hysen Salihu.

Në mbi 20 të rinjë të larguar nga puna ka edhe të rinjë që ishin të angazhuar në kuotën e personave me aftësi të kufizuara.

Është larguar nga puna edhe gruaja, burri i së cilës, u vra në vitin 1999, nga policia serbe në malet e Tërnocit! 

Drejtësia nuk duhet të jetë selektive. Barazia nuk ka kuptim nëse nuk është e plotë! Ndaloni standardin e dyfisht dhe zgjedhni metodën për të bërë politikë.

Kimetja njejtë si Leutrimi është fëmijë e dëshmorit.

Nazlia është grua, burri i së cilës u vra në vitin 1999, si pjesë e 11 vrasjeve të shqiptarëve të pasqaruara në Bujanoc.

Labinoti është një i ri i cili ka nevojë të trajtohet në formë të barabartë!

Benhuria, Lumja e Kujtimja janë vajza profesioniste që kanë vendosur të jetojnë këtu.

Iliriana ka krijuar familje dhe ka nevojë të punojë. Fikreti e Florenti poashtu!

Nga puna u larguan edhe Halili e Endriti.

Ka edhe të tjerë, emrat e të cilëve nuk i di!

E për dallim prej Preshevës, vendet e zbrazura të punës në Bujanoc do të plotësohen bazuar në marrëveshjen e koalicionit për bashkëqeverisje 50%, 40%, 10%. 

Pra, nga numri i përgjithshëm i të larguarve nga puna, 50% i tyre nuk do të jenë më shqiptarë!

E vërteta mbetet e vërtetë, edhe atëher kur e njejta shtrembërohet ose edhe kur për të nuk flitet!