Në Serbi po thonë se kanë marrë konfirmim zyrtar nga Xhamajka se ky shtet nuk e ka njohur pavarësinë e Kosovës.

Ministria e Punëve të Jashtme e Serbisë ka kërkuar konfirmim zyrtar nga kryeqyteti Kingston se Xhamajka nuk e ka njohur Kosovën, merr vesh “Tanjug” nga MPJ serbe, transmeton lajmi.net.

Ministri i Jashtëm serb, Ivica Daçiq ka thënë për agjencinë serbe të lajmeve se kanë marrë konfirmimin e kërkuar, në fakt demantin e Xhamajkës rreth njohjes së Kosovës, e vërtetuar edhe nga ministrja e Punëve të Jashtme e Xhamajkës, Kamina Johnson Smith me një postim në Twitter.

Ndërkaq, më herët gjatë ditës ka reaguar edhe ministri i Jashtëm i Kosovës, Glauk Konjufca, i cili ka thënë se lajmin për njohje nga Xhamajka e ka marrë nga ambasadorja e Kosovës në SHBA, Vlora Çitaku.

Kjo e fundit ndërkaq nuk ka folur ende në lidhje me rastin në fjalë.