Shefi i Grupit Parlamentar të LDK-së, Avdullah Hoti, duke komentuar disa nga ngjarjet e fundit në vend, ka thënë se Kosova duhet të prodhojë lajme për investitorë të huaj e arritje në diplomaci, në vend të grevave e regresit në luftën kundër korrupsionit.

“Kosova e bllokuar nga grevat në arsim, shëndetësi dhe administratë, të nxitura nga vendimi i Qeverisë për të rritur pagën për vete, edhe pse kjo u vlerësuar të jetë konflikt i interesit nga Agjencia Antikorrupcion, që është e thirrur ligjërisht për të dhënë vlerësime të tilla”, thotë Hoti në një postim në Facebook, ku ka listuar 3 kritika ndaj Qeverisë Haradinaj.

“Kosova ka bërë regres në luftimin e korrupsionit. Transparency International vlerëson se Kosova ka rënë nga pozita 85 në pozitën 93. Kjo sigurisht nuk është e papritur me këtë qeveri”, shkruan më tej Hoti.

Më tutje, kryeministrin Ramush Haradinaj, Hoti e quan “kryeministër në largim”, duke kujtuar deklaratën e të parit të ekzekutivit për prishje të marrëdhënieve me SHBA-në.

“Kosova në prag të prishjes së marrëdhënieve miqësore me SHBA. Kryeministri në largim deklaron se kjo nuk është problem”, deklaroi Hoti.

Hoti thotë se lajme të tilla nuk duhet të prodhohen në Kosovë.

“Ne duhet të prodhojmë lajme për investitorë të huaj që investojnë në Kosovë, për arritje në diplomaci, për përmirësim të jetës së qytetarëve, lajme për plotësim të kërkesave për integrim evropian”, përfundoi shefi i GP të LDK-së, Avdullah Hoti.