Besarta në RTV Dukagjini, tregon se luftimet që kishin filluar me 5 mars të vitin 1998 kishin lënë të vdekur gruan e Adem Jasharit, ndërsa të tjerët kishin qenë të gjallë deri më 7 mars.

Ajo rrëfen se i pari që ishte vrarë duke luftuar me serbët më 7 mars, ka qenë Adem Jashari, e më pas babai i saj Hamza dhe gjyshi.

‘Pas vrasjes së tyre, tanket kanë filluar të afrohen edhe më shumë te shtëpia jonë. Ato kanë filluar të gjuajnë në drejtim të dhomës sonë, pasi nga kjo dhomë djemtë tonë ishin vazhdimisht duke gjuajtur me armë në drejtim tyre. Ata filluan më pas të bombardojnë dhomën tonë’, tregon ajo.

Pasi serbët ua bombarduan dhomën, Besarta rrëfen tutje ngjarjen, e tregon edhe për momentet e fundit të familjarëve të saj.

‘Momentin e fundit kemi mbetur gjallë unë, motra Blerina, Kushtrimi dhe Hidajetja – vajza e Rifatit. Unë kam dalë nga dhoma për të parë mos janë larguar serbët. Sapo kam dalë nga dhoma serbët kanë filluar të gjuajnë në drejtim timin dhe jam kthyer në dhomë. Kam pyetur Hidajetin se ku është Kushtrimi, por mu përgjigj se ai ka dalë pas meje dhe nuk u kthye. Më vonë nëpër foto kam parë se Kushtrimi është vrarë në oborr’.

Besarta më tej tregon se serbët nuk kishin ndalur, dhe vazhdimisht gjuanin bomba.

“Pasi kanë hyrë në shtëpi serbët janë afruar dhomës sonë dhe kanë gjuajtur granata dhe bomba. Në atë moment ka mbetur e vrarë Hidajeti dhe është plagosur në gjithë trupin Blerina. Unë kam shkuar në dhomën ku ka qenë baci Adem dhe jam shtrirë sikurse të isha e vdekur”.

Ajo rrëfen më tej se serbët e kanë zbuluar se ajo ishte e gjallë duke marrë dhe nxjerrë nga shtëpia.

‘Kanë hyrë forcat serbe dhe kanë prekur secilin familjar duke shikuar a janë të vdekur. Ata kanë marrë armët e bacit Adem dhe kanë lozur me to. Kur kanë ardhur tek unë kanë parë që jam e gjallë dhe më kanë marrë e më kanë nxjerrë jashtë. Aty kishte qenë e shtrirë e vdekur motra ime Blerina’, rrëfen mes emocionesh Besarta Jashari.