Një autobus i Armatës së Republikës së Maqedonisë (ARM) plot me ushtarë ka marrë flakë sot në rrugën Probishtip – Kratovë në Maqedoninë lindore, katër kilometra larg Probishtipit.

Në vendngjarje është intervenuar me dy automjete zjarrfikëse dhe sipas njoftimit të Ministrisë së Mbrojtjes të Maqedonisë, në incidentin nuk ka asnjë të lënduar.

Në deklaratë për MIA-n, kryetari i komunës së Probishtipit, Dragan Atanasov thotë se shoferi i autobusit ka reaguar me kohë dhe të gjithë ushtarët të cilët ndodheshin në autobus kanë zbritur të sigurt.

Autobusi është djegur tërësisht.

Ministria e Mbrojtjes, në komunikatën lidhur me rastin, shpreh keqardhje për rastin me autobusin e djegur i cili sot në mëngjes  për në vendet e tyre të punës në Shkup ka transportuar  pjesëtarë të ARM-së nga Probishtipi, Kratova dhe Kumanova.

Pjesëtarë të Policisë Ushtarake dhe ekspertë menjëherë kanë dalë në vendin e ngjarjes  që të konfirmojnë rrethanat nën të cilat ndodh ky incident.

MM nga firma e cila siguron transportin pret që të bëhet analizë për rastin me qëllim që i njëjti të mos përsëritet.