Presidenti rus, Vladimir Putin ka lëshuar një paralajmërim të ‘ashpër’ ndaj përpjekjes së Kosovës që të krijojë ushtrinë. Sipas Moskës zyrtare, Ushtria e Kosovës mund të djegë gjithë Ballkanin.

Ministria e Jashtme ruse ka shprehur shqetësim për vendimin e parlamentit të Kosovës për t’i rikthyer Forcat e Sigurisë së Kosovës në ushtri të plotë.

Kjo ministri ka theksuar se një vendim i tillë minon stabilitetin e Ballkanit, transmeton lajmi.net.

“Rusia i ka tërhequr vazhdimisht vëmendjen komunitetin ndërkombëtar se tendencat e tilla nuk janë në përputhje me Rezolutën 1244, e cila thotë se Kosova duhet të mbetet nën mbikëqyrjen e ndërkombëtarëve. Askush nuk mund të jap garanci se të ashtuquajturat forca të armatosura të cilët përbëhen nga terroristë të UÇK-së nuk do të përdorin dhunë kundër popullatës serbe në Veri”, thuhet në deklaratën e ministrisë ruse.

Tutje, thuhet se ata që mbështesin Prishtinën po përpiqen me shpejtësi të riorganizojnë FSK-në në ushtri të plotë në mënyrë që të transferojnë ish militantët nën patronazhin e NATO-s.

“Ushtria e Kosovës minon stabilitetin në Ballkan dhe nuk është në përputhje me të drejtat e atyre që jetojnë atje dhe e meritojnë një të ardhme të qetë dhe të sigurt”, përfundon deklarata e MPJ-së ruse.

Kundër Ushtrisë së Kosovës është shprehur edhe Qeveria e Serbisë, zyrtarë të së cilës kanë deklaruar se do të përdorin çdo mekanizëm për ta parandaluar themelimin e saj.