Në 19 vjetorin e vdekjes së Presidentit historik të Kosovës, Dr. Ibrahim Rugova, Kryetarja e Komunës së Preshevës, Znj. Ardita Sinani, ka ndarë homazhe për të nderuar figurën e tij dhe veprën e tij të paharrueshme.

Me këtë rast, Znj. Sinani theksoi se Dr. Ibrahim Rugova nuk ishte vetëm një lider i shquar i Kosovës, por një simbol i unitetit dhe i luftës për liri dhe pavarësi për shqiptarët kudo që ndodhen. Ajo theksoi se figura e tij vazhdon të mbetet një model i liderit të urtë dhe të guximshëm, i cili me këmbëngulje dhe maturi arriti të drejtonte popullin shqiptar në rrugën drejt lirisë dhe pavarësisë.

“Edhe 19 vjet pas vdekjes së tij, Dr. Ibrahim Rugova mbetet një udhërrëfyes për ne, një frymëzim për të gjitha brezat e rinj, dhe një shembull i fortë se si një lider duhet të veprojë për të realizuar qëllimet e një populli. Veprat dhe mesazhet e tij do të mbeten gjithmonë të gjalla në zemrat e shqiptarëve të Kosovës, Preshevës, Luginës, Maqedonisë dhe Malit të Zi,” tha Kryetarja Sinani.